ალბათ იწვიმებს როცა მზე ჩავა,
და ჩვენ ხმამაღლა შევიხსნით დუმილს,
მერე სურვილი გვექნება შავი,
მერე სურვილი გვექნება უმი.

როცა მზე ჩავა იწვიმებს ალბათ,
და შეხსნილ დუმილს წაიღებს ბინდი,
შენი ხელები როგორც მზა ყულფი,
შემომეხვევა ყელზე და მინდა

ასე დავიხრჩო გავთავდე ასე,
როგორც არავინ და როგორც ყველამ,
სადამდეც ღრუბელს ეყოფა მასრა,
სადამდეც ღრუბელს ეყოფა ხველა.

ალბათ იწვიმებს როცა მზე ჩავა,
და ჩვენ ხმამაღლა შევიხსნით დუმილს,
მერე სურვილი გვექნება შავი,
მერე სურვილი გვექნება უმი.