რა შეგვრჩა წმინდა? შეგვრჩა კი რამე?
დარწმუნებული არ ვარ სრულებით
და რომ გვცოდნოდა, მერე ვინანებთ,
ალბათ, რა მალე დავასრულებდით

ყველაფერს, რისიც გვრცხვენია უკვე,
მაგრამ გვეგონა ადრე საჭირო.
თუ შეამჩნიე, რომ სხვაგან ვუხვევ,
თუკი შეძელი, გთხოვ, გამაჩერო.

უკან არ ვიხევთ აღარც ღალატზე,
არადა ვიცით, ბოლოს რომ მოგვკლავს
და სამწუხაროდ, გვიან ვაფასებთ
ოცდაათ ვერცხლად გაყიდულ მოყვასს.

გადის დრო მალე, დრო მალე გადის,
აი, უკვე მზეც შეცვალა ქარმა,
ვგავართ ფილმიდან ამოჭრილ კადრებს,
ვიღაც რომ ბოლოს ნაგავში აგდებს -
ბუმერანგივით ბრუნდება კარმა.