ნაწარმოები შეიცავს უცენზურო ფრაზებს

თუ თქვენ გინდათ ნახოთ მხოლოდ ეს ნაწარმოები, დააჭირეთ აქ

შენ ვერ გაუძლებ ნაბახუსევზე ალეწილ სახეს,
შენ ვერ გაუძლებ თავის ტკივილს ნაბახუსევზე,
მაგრამ დალიე
ბევრი დალიე,
ყველა დალიე,
რომ გაითიშო,
რომ ქვითარივით მოგივიდეს კითხვები არსზე,
კითხვები ღმერთზე,
არარსზე და მარადიულზე
და თელასიდან მოსულმა თესლმა
ეგეც არ მყავდეს ნიკოლა ტესლა,
დენის წყაროდან გამოგირთოს ცნობიერება.
დალიე სპირტი,
სანამ ჩაგდის და სანამ ვინმე შუბლზე ორივე ხელს შემოირტყავს
მაგრამ, შენს შუბლზე.
დალიე, სანამ ტვინის, ხორხის და კუჭის გზები ერთმანეთს ისევ უკავშირდება.
დალიე, სანამ დიდთოვლობისას არ გადაკეტეს ეგ შენი გზებიც.
და ვინმე ანჩხლი ახვარი თუ მოვა და გეტყვის: "ნუ გადაცდიო ცხოვრების გზას, თავს ნუ იფუჭებ!"
უთხარი, ანდაც ნურაფერს ეტყვი, ისე იცოდე,
რომ ყველა დიდი მაგისტრალი,
ყველა ბილიკი,
და ყველა მცირე ნაკვალევიც თოვლიან გზაზე
სახლში კი არა,
ღმერთთან კი არა,
ზევით კი არა,
ქვევით კი არა,
რომში კი არა,
რომთან მიდის
და
რომში იხრჩობა.