მე ვწერდი დიდ სიყვარულზე,
ვუსმენდი სატიეს და ვსვამდი ყავას, რომელიც
სტამბულში მოგზაურობისას მომყიდა
იქაურმა თურქმა ოცდახუთ ლირად.
თუმცა არაფერ შუაშია
ახლა ის თურქი,
არც სტამბული და
არც სატიე.
***
მე ვწერდი დიდ სიყვარულზე ახალგაზრდული ვნებით
და მეზიზღებოდა ყველა ნაწერი თავისი
მოუშორებელი სინამდვილით.
***
მე ვწერდი ოცნებებზე და მეშინოდა მათი ახდენა,
რომ არ დამეკარგა სამყაროს აღქმა თავისი
თავბრუდამხვევი სიახლეებით.
***
იმდენი ვწერე სიყვარულზე,
რომ გამოჩნდეს შეიძლება ზურგი ვაქციო.
ვერ ავიტანო მისი სიდიდე და შევიყუჟო
ცივ ოთახში სიმარტოვის
დაკარგვის შიშით.
***
მე ჩემს ნაწერებში ვცხოვრობ,
ნუ გამომიყვან ცრუ იმედებით.
**
ადამიანი იქამდეა ადამიანი,
სანამ შეუძლია ცრემლების
დათვლა.
სანამ შეუძლია ტკივილის
თოკზე გაკიდება.
***
იმდენი ვწერე სიყვარულზე,
რომ გამოჩნდეს შეიძლება შემზიზღდეს კიდეც,
როგორც უსიყვარულოდ
გატარებული წვიმიანი
გაზაფხული.
როგორც უნაყინოდ გატარებული
ცხელი ზაფხული.
როგორც უქურთუკოდ გატარებული
ცივი შემოდგომა.
როგორც უფეხსაცმლოდ გატარებული
ცივი ზამთარი.
***
იმდენი ვწერე სიყვარულზე,
რომ გამოჩნდეს შეიძლება ზურგი ვაქციო.
ვერ ავიტანო მისი სიდიდე და
ბედნიერებას ჩავუდგე ჯიბრში.