ცელქი ნიავი ფოთლებს შორის მღერის რანინას,
ასკინკილები გაუმართავთ ხნულებში ჩიტებს.
თეთრ-ვარდისფერი წაუსვიათ ფერუმარილი
სულ ახლადგაშლილ ნუშისა და ტყემლების კვირტებს.
თითის წვერებზე აწეულა თოთო სამყურა,
მასაც რომ ერგოს მზის ალერსი, ნანატრი სითბო.
ცაც კი ქცეულა გაზაფხულის მწედ და თვალყურად,
ეს გაზაფხული იბადება პირველად თითქოს...
ნიავმა თმები აუწეწა ბაბუაწვერას,
ცისა და მიწის საგალობელს ასრულებს შაშვი.
რა ნატიფი აქვს ოთხივე დრო ბუნება-მწერალს,
ჯერ შექმნის, მერე წასაკითხად დროს ატანს სახლში...
      05.05.20