***
ცხვება ლავაში,
ლუდხანაში
ილევა ლუდი...
ცვდება ტალახში,
შემცივნული
“მათხოვრის” ქუდი...

***
ქალაქის ფოთლებჩაცვენილ ქუჩებს,
კვლავ ბოშა ქალი გასძახის - “ხურდა”,
ვიღაც პოულობს ურნასთან “ტუფლებს”
და უხარია, ასეთი სურდა...

***
წვიმს... მიწისქვეშა გადასასვლელში,
თათარი ბიჭი უკრავს გიტარას
და ჩუმი ნატვრა ობლის თვალებში,
ქარმა ფოთლებით შემოიტანა...

***
ისევ მარტო ვარ და ვეძებ ბინას,
ღმერთს ვემეტები ცივი ღამისთვის,
შენ იქნებ ახლა სულაც არ გძინავს
და არჩევ კაბას პაემანისთვის...

***
თოვლია... ბინდი გადადის მალვით,
ჩვენი შეხვედრაც მალე მოხდება,
სველი სადგური, დგას ბოშა ქალი
ბავშვით ხელში და მზეს ელოდება...

***
ვიღაცას უდგას დღეები რთული,
მძიმე ავადმყოფს სადღაც უვლიან
და ვამჩნევ ახლა, რომ ჩემი სული,
ჩემი სახლივით გაბზარულია...