დრო მაფიქრებს, დრო მაბერებს,
მაინც დროა მკურნალი!
ჩემი დარდის დრომადერებს
არ მივყავარ ურვამდე...
დრო მანძილებს ისე ზომავს,
როგორც თერძი შესაკერს.
და შედეგის დრო რომ მოვა,
ერთხელაც არ შეგაქებს!
საარქივოდ თვითონ არჩევს
ჩემი წამის მოწყვეტას...
ისე, ჩვენ შორის რომ დარჩეს,
ერთადერთი მოწმეა...
დრო კი არა, ჩვენ ვიცვლებით,
მას ვაბრალებთ, რატომღაც...
ის ივსება, ჩვენ ვიცლებით,
თუმცა, ისიც მარტოა...
დრო არასდროს არის ცუდის
და არც კარგის მაქნისი.
წამოეცვა თავზე "ჰუდი",
მიდიოდა თავისთვის...
01.01.21