შესაძლებელია ამოიცვა ფეხსაცმელი,
შესამჩნევად ამოიოხრო
და კინწის კვრით მიაბრძანო
მოვალეობით გამძღარი მოძრაობის ჯერადი ყოფა უმისამართოდ.
სადმე წასვლასავით თადარიგის დაჭერაც შესაბამისობას მოითხოვს.
წესიდან წესამდე გადაშლილ
ნასესხები დღეებივით თავმოქაჩლებულ თავისუფლებას
ხავიწის ფერი დაედება,
პირ მოთითხნილი ამოიქოშინებ და შეგზარდება
უნარების გამოძახილი,
საჭიროების მიხედვით გამომუშავებული
-,,გუნდური მუშაობის პრინციპი’’,
,,სტრესულ გარემოსთან აქტიური თავსებადობა’’
და უამრავი ხრინწი,
რომელსაც თმენის ძალაყინით ექაჩები სადღაც სიღრმეში,
რომ არ ამოსხლტეს,
სისუსტე არ ამოგატვიფროს
სიმშვიდით შელესილ ფასადზე,
არ ჩამოგაქციოს და ჩამოგანგრიოს იქამდე,
ვიდრე მოძრაობით გადაღლილს,
ქოფაკებივით შეზღუდული
ფეხების აშვება არ მოგინდება,
თუ მანამ თასმაზე არ  დაიბიჯე და გადაყირავდი.