ხასხასა მწვანე აკრობატო,
რა დაგრჩენია ამ ქალაქში,
ბუღსა და მტვერში,
მანქანების გამონაბოლქვში,
ათასჯერ აყრილ
და
ამდენჯერვე
დაგებულ ასფალტზე?
გუშინ საღამოს,
როცა მაღაზიაში შევდიოდი,
მოწყენილობისგან გაბრუებულს,
ცხვირწინ ჩამიქროლე,
საუცხოო „სალტო-მორტალეთი“
და
განათებულ ვიტრინას მიასკდი,
მე კი,
შურით ავივსე,
რომ შენსავით ხტომა არ შემეძლო!
თვალის ერთ დახამხამებაში
მოწყდი იქაურობას,
თითქოს რაიმე მოულოდნელი
საფრთხე გეგრძნოს
და გაფრინდი,
მაგრამ,
ვინ იცის,
საითკენ?!
მშვიდობით,
მოულოდნელად გამოჩენილო,
სწორფრთიანო,
მწვანე კალიავ...