სევდისფერია ჩემთვის სოხუმი,
ჩემთვის ტამიშიც სევდისფერია,
ვართ ტკივილებით გარემოცული,
სევდის ლექსს მღერის სევდის ფერია.

მინდა დავკოცნო მინდვრად ღიღილო,
გულიც დაიწვას, როგორც სანთელი...
მინდა ილორში ერთად ვიხილო
ნაღდი აფხაზი, ნაღდი ქართველი.

მწამს: შავი ნისლი გაიფანტება,
აღმობრწყინდება ჩვენთვის მთიები,
კვლავ დავიღვრებით მშობლურ ჰანგებად,
იგალობებენ მაფშალიები.

მთიები - ცისკრის ვარსკვლავი

მაფშალია - ბულბული