მენატრება ის დრო,
რომ ვცეკვავდით ერთად...
ახლა გრანელივით
ვიარები კენტად.

მსურს ვიცეკვოთ ისევ
,,დავლური“ ან ,,სიმდი“,
აფსუს! მერცხალივით
რა შორს გამიფრინდი.

მინდა გამიხარო
სევდიანი გული,
ბავშვობიდან მოგვდევს
ცეკვის სიყვარული.

შენს ცერებზე დგომებს
ვიხსენებ და მჯერა:
კვლავ მოვიგებთ ომებს,
გალაღდება კერა.

გწამდეს: ჩვენი მიწა
იამაყებს ჩვენით,
შენ - ქართული კაბა
ღიმილივით გშვენის.

მენატრება ის დრო,
რომ ვცეკვავდით ერთად...
ახლა გრანელივით
ვიარები კენტად.

მსურს ვიცეკვოთ კიდევ
,,დაისი“ ან ,,სიმდი“,
ვაი, მერცხალივით
რა შორს გამიფრინდი.

ოთარ რურუა

2023