შენ არ საჭიროებ ჟარგონს და ბარბარიზმს,
დღეიდან,
ზიხარ და ეწევი და უსმენ ბარბარა
სტრეიზანდს.
მიდიხარ და სახლში იბარებ: მოვალო,
ამაღამ.
გადიხარ. ახალი სკვერია. ოვალთა
დამღაა.
ჩაივლი ჭადრებთან - ახალი სკვერითვე.
სალამი.
და ისევ ვერ ითმენ ამ ენკენისთვის
საღამოს.
შეგხვდება ნაცნობი. შუახნის და ჩია
მეწაღე.
ისეთი თბილი და მზრუნველი კაცია,
ჟორიკას გეძახის.
ყოველი შეხვედრა, წინა და მორიგი,
აგავსებს.
ახალია სკვერია: მეწაღე. ჟორიკა.
ნაგაზი.
ბავშვები - ბურთებით და საქანელების
ჭრიალით.
საუბარს უნდებით. ცა გაქანებული.
კრიალა.