შიშველი. სიზმრით. ჯერაც უხილავ
ვარსკვლავებს შორის. დუმილის ფონი,
გაშვებულ შანსზე ფუჭი წუხილი,
მორფი.
ჭადრაკი.
სიფხიზლე.
მორფი.

ხასხასა ველი, აღმართით, მინდვრით,
მხრებზე წყლით სავსე სათლების თრევა,
ჰამაკში ცივი ყინულით სიდრი,
თეთრი ღრუბლების ქარებით რბევა,

დამსკდარ ქვედატუჩს თხელი საფარი,
უძილობებით მოღლილი ტემბრი,
თვალის გუგათა შავი საფანტი,
კაშხალი. შორი. თანაბარტბები.

სახეფერმკრთალი.
კანი მინანქრის.
რბილი სურნელი ავოკადოთა.
უპეებიდან
გამომდინარი
წვრილ სათავეთა შენაკადები.

შიშველი. ღამით. ჯერაც უხილავ,
პლანეტებს შორის. სიჩუმის ფონი.
ხელჩაქნეულთა გულისწუხილი,
მორფი.
სიმშვიდე.
ჭადრაკი.
მორფი.