ზაფხული მწვანე კონცხზე

მახსენდება, მენატრება ბავშვობა,
გორტენზიის მომცინარე ბუჩქები,
მაგნოლიის მათრობელა სურნელი,
და ტალღების მოჩურცულე ხმები,

მომენატრა „თეთრი სანატორია“,
მწვანე კონცხზე აღმა დაღმა სირბილი,
მახსენდება „სოიუზტრანსის“ მანქანა,
ტურისტები თეთრი „სეტკა“ მაიკით,

ვუყურებდით ცოტა გაკვირვებული,
მამაჩვენი პერანგით და ჰალსტუხით,
ტურისტები სასაცილო სანდლებით,
ბადურაში არყითა და ვაშლებით,

ახლა წლებმა ყველაფერი შეცვალა,
გორტენზიას გაუხუნდა ფერი,
მაგნოლიას აღარა აქვს სურნელი,
ტურისტი კი დადის „მოკასინებით“
მახსენდება მენატრება ბავშვობა,
მოგონება სევდანარევ იუმორით.