#ლექსები
ნინო დარბაისელი

სიზმრის წიგნიდან - მახინჯები
(“ვინც ჩვენ არა გვგავს- მახინჯია”- ნინოლო მაკიაველი)

(სპენსერული სონეტი - ABAB BCBC CDCD EE).

ზოგი სიზმარია - სულ გადაგრევს!
წუხელ  დამესიზმრნენ მახინჯები.
რაღაცას განვიცდიდი, შიშთან ნარევს,
ახლა რად ვიხსენებ, რად  ვირჯები?

მეტყვით,  ხალხიაო  ნატანჯები, 
შენ -  არ შეგფერისო  ეგეთები,
იცოდე,  სულ ტყუილად იხარჯები,
საწყალს მტერივით  თუ  ეკვეთები.

რა არ მოგეწონა?  რა - ნაკვთები?
იქნება ბუნებით  - კეთილია.
ან გაღვიძებულზე რაღად კრთები?
ეს ცხადი ხომ გამოკვეთილია.

“სიზმრად თუ  მახინჯი  სახე ნახო,
ცხადში - არ აგცდება  სავაგლახო!”