მუსიკას ვუსმენდი ფილმიდან "შერბურის ქოლგები" და ...



დღეს შევიძინე ახალი კაბა და სარკეებში ფიქრს გავეკიდე...
იდგა მზე ცხელი მწველი ტოსკანის და ღია კარში იდექ შენ კიდევ...
ტუჩებზე გქონდა სურვილი ჩემი და შენი სუნთქვა ვნებით მათრობდა,
ღირდა ის ღამე? ნამდვილად ღირდა სიყვარულისთვის, არა გართობად...
შენ ბაღში კრეფდი მწიფე ალუჩებს, ვარდებს, იებს და ცისფერ სამყურებს,
ჩემთვის პარავდი მთვარეს ნათებას, კოცნით მაბნევდი ოქროს საყურედ...
დღეს შევიძინე ახალი კაბა, ბალახზე დაყრილ ალუბლის ხალით,
სარკე ძველია, ფიქრებიც ძველი, არც სიყვარული არის ახალი...
ხელის გაწვდენის მანძილზე დგახარ, ღია კარი კი ირწევა ანცად,
დაბნეული ვარ ვით ალუბალი, მინდა ტუჩების ალერსით ამცრა.
მოდი ამკრიფე ალუბლებივით, სანამ დაბნევის გამივლის განცდა,
მერე რა, თუკი მზე დგას ტოსკანის, ახლა მთვარისთვის აღარ ღირს დაცდა.
დღეს შევიძინე ახალი კაბა და სარკეებში ფიქრს გავეკიდე,
გარეთ მზე იდგა მწველი ტოსკანის, ოთახში მართლა იდექ შენ კიდევ...
მე გავიქცევი, მე გავიქცევი, მე გავიქცევი, გამომეკიდე...