მუხრუჭდება მოძრაობა მკვეთრად!
ფურცელს ვიღებ, რომ დავწერო რამე,
თორემ ცოტაც... და გაივლის თეთრად
კიდევ ერთი გატეხილი ღამე!
შემცირდება კიდევ ერთი ღამით
გრძელი გზები ცის და მიწის შუა...
აღარ ჩამთვლემს აღარცერთი წამით...
ლექსსაც დავწერ, თუ შემომრჩა ჭკუა...
ტომარაში თუ არ დამხვდა ქვები,
ძველებურად გიწილადებთ ლუკმებს...
მაგრამ... ვაგლახ! რაც ამ ზღაპრებს ვყვები,
ათას ერთი დღე დაღამდა უკვე!
ერთი თქვენი ისეცა და ასეც!
დავიღალე და ცაც მოიწმინდა...
- ვაჰ, თანატოს! გამარჯობა, ბრატეც!
შენს ძმას სთხოვე, ლაპარაკი მინდა!