იყავით ბრძენნი, ვითარცა გველნი. ჩამოიცილეთ ნიღაბნი ძველნი და წყლის ნაპირზე დატოვეთ შხამი, რომელიც ახლა თქვენს სულს თან ახლავს, იყავით ბრძენნი და თქვენი დღენი აღარ აქციოთ ბალღამად, შხამად, აღარ გინდოდეთ შური და ზაკვა, აღარც საქმის და არც სიტყვის კაკვა, არც სიძულვილი,  არც მოძმის ლაფვა, არც სიკვდილი და არც სულის ღაფვა, აღარ გინდოდეთ თქვენ არაფერი, რასაც ბოროტის ბეჭედი ახლავს, აღარ გინდოდეთ მლიქვნელთა ჯარი და არც იმათი ქლესური ლაქნა, აღარ გინდოდეთ სამაგიერო, შურისძიების ბოროტი აღთქმა, ნურც დიაცების ჩურჩულს ენდობით, თქვენ ვერას მოგცემთ ლამაზი კახპა, არც ჩინ-მედლები აღარ გინდოდეთ, არც ჯილდოების უგრძესი აცმა, ნურც ფულს ექცევით ყურმოჭრილ მონად, რა თავში იხლით ქაღალდის დასტას, ნურც სხვა სიამეთ ნუღარ ემონვით, აღარას მოგცემთ თვალების ნაბვა, აღარ გინდოდეთ ცრუ ბრწყინვალება,  კიბის მწვერვალზე ასვლა და ასვლა, აღარ გინდოდეთ არც სავარძელი და ბილწ საქმეში ხელების გასვრა, აღარც  სიცრუეს აღარ ემონოთ, არც ტაშისცემას - ცრუ ხმათა ლაშქარს, აღარ იაროთ სისხლიან გზებზე, აღარც სიკვდილი არ თესოთ არსად, არც დიდ მბრძანებელს - ქვეყნის გამგებელს აღარ დაუდგეთ არასდროს ხასად, არც შავი თეთრად, არც მცირე მაღლად აღარ ახსენოთ აღარსად, არსად, არც მეგობრობა აქციოთ ფარსად, არც ოჯახის ჭერს განუდგეთ არსად, აღარც სიმართლე აღარა დასთმოთ, თუნდაც დაგიჯდეთ სიცოცხლის ფასად, ნუცა წყალობას ნუ დაიშურებთ, ნუ დაიშურებთ, იყავით კაცად, ნუ დაინანებთ ნურც გულის სითბოს, ნუ განიკითხავთ, ნუ განსჯით მკაცრად, და გაიხადეთ სამარადჟამოდ კაცთ სიყვარული სიცოცხლის აზრად. იყავით ბრძენნი, ვითარცა გველნი, ჩამოიცილეთ ნიღაბნი ძველნი, და წყლის ნაპირზე დატოვეთ შხამი, რომელიც ახლა თქვენს სულს თან ახლავს, მაგრამ როდესაც თქვენ იგრძნობთ ახალს, სულის მოთქმას და საგანთა აღქმას - ნუ ემსგავსები თქვენ მოდგმას ამაყს და ნუ იფიქრებთ, რომ თქვენ ხართ რაც ხართ, ო, ნუ იქნებით ამპარტავანნი, თორემ მე ვიცი, მე ვხედავ ნათლად - წყალი ჩაგყლაპავთ და მოგინილებთ, როგორც უმადურ და უღირს ბაყაყთ, იყავით ბრძენნი, ვითარცა გველნი, ჩამოიცილეთ ნიღაბნი ძველნი - თუ გინდათ ნახოთ თქვენ წყალნი ვრცელნი..........