არეულობა ტყეში

ჩაიწერა კაცკაცულამ
დიდი სია რვეულში,

"ციყვს მუვუტან თხილსა,
ერთ ქილა თაფლს დათვსა,
ბაჭიებს კი სტაფილოს
დედა კურდღლის წილსაც.

ხორცის ნაჭერს ლომსა,
მელაკუდას თევზსა.
“მე ვფიქრობ,რომ ამ ნობათს
დავუმატებ ყველსაც".

და დაადგა კაცკაცულა
ტყისკენ ვიწრო ბილიკს.
სახლში სია დარჩენია,
ნუ დავუწყებთ ქილიკს.

აღარ იცის ვის რა მისცეს
შავ დღეშია ბიჭი.
ციყვს სტაფილო მიართვა და
კურდღელს შეხვდა თხილი.

ლომმა თაფლი გადასანსლა
“კარგიაო, ტკბილი”
მელიამ და დათუნამ კი თევზს
გამოჰკრეს კბილი.

ასე აერ-დაერია
კაცკაცულას სია,
ცხოველებს კი მოეწონათ:
"რა გემრიელია".

ამის შემდეგ წესად იქცა
გადაპატიჟება,
ციყვი ლომს თხილზე პატიჟებს,
დათვი თაფლზე მგელსა.

თაფლს ბაჭიაც გეახლებათ,
კომბოსტოს კი მელა.
სუფრას გაშლიან, მღერიან
დელი-დელი-დელა.

"კაცკაცულას გაუმარჯოს"!
-ამბობს ლომი ღიად.
"კიდევ კარგი დაავიწყდა
ის წყეული სია".