ბჰაგვან ღვთის გლახას საღმა აზრმა დროზე მოუსწრო,
თქვენც რომ დაყაროთ ეგ კალმები ხელს რაღა გიშლით?
ადოლფ კომუნისტ, მახვილკუთხა წრევ და უინსტონ,
ფეხზე ადგომით მიესალმეთ ოშო რაჯნიშვილს.

წრეზე ტრიალი საკუთარი თავის გარშემო,
დიდხანს ვერავის ვერ შეერგო ჩემი ფოტოთი,
მახვილკუთხა წრევ ის ლექსია ალბათ საშენოც,
და ის ღვთის გლახა გაგიმართლებს მახვილ მოლოდინს.

სახურავებზე ელვა მალე გაგასხივოსნებს,
ფაშფაშა ქალებს უთვალთვალებს შევალიე და,
დასავლეთიდან მზე ამოჰყავთ ბათუმელ მგოსნებს,
დიდმა რუსეთმა რაც აჭარა შემოიერთა.

მაგრამ დრო იყო აჭარაში რა დაგიმალოთ,
ასლან ლომგულმა გაუჩინა სულს ატროფია,
რომ გაგვახსენა ფრიდონი და კიდევ ჯემალი,
კომუნისტია, პოეტია თუ ადოლფია?!

ქალი რომელიც სიკვდილმაც კი გადაიფიქრა,
ცოლად მომყავს რომ მერე გახდეს ის ჩემი ქვრივი,
მოწყდა კომეტა ანუ ღმერთმა მოწია იქ და
ის სიგარეტი მოისროლა ძალუმად ქვევით.

მე გირწევ აკვანს მეგობარო ამდენი რწევით
არტახს აიწყვეტს შთაგონების წყარო - პლანეტა,
საფერფლე მაინც დავამსხვრიე, თუმც არ ვეწევი,
ახლა არავინ აღარ მეტყვის გენაცვალეს და

მე ვარ ველური, აფთარი და კიდევ რა ვიცი,
ჩემი მუზა და ფერია ხარ ო, ფროილაინ,
რომ მოვიტეხე ოთხი წლის წინ ჩხუბში ლავიწი,
იმაზე მეტად მატკინე და მიყვარხარ მაინც!