ერთმა ჩემმა მეგობარმა ქართული ლექსიკონიდან წვიმის 60-ზე მეტი დასახელება ამოკრიფა. თუმცა, ამაზე მეტიც ყოფილა...
როცა იმ სიტყვებს ვკითხულობდი, მაშინ წამოვიდა ეს ლექსი. რა გამოვიდა, თქვენ თვითონ განსაჯეთ. მე კი წვიმის რაკრუკის მოსმენის ხასიათზე დავდექი:))) და აე დავარქვი ამ ლექსს:

სიყვარულის ახსნა წვიმის ენაზე


შენზე ფიქრების ვერ ვძლევ არაზანს,
მალ-მალ მადგება ცრემლის გერილი,
ხანდახან თმებით მთქორავ ლამაზად,
ვიქცევი ღვაფად დელგმად დენილი.

ნეტავ რად ვერ გრძნობ ამ გულში მერეხს,
სიყვარულის თქეშს, ლეზღას და ისხარს,
რად ჩამიყენე გულში ქაშანი,
ან დაჭრილ სულში ჟიჟმატს რად მისხამ?

შენი თვალების ვნებიან ფრუტით,
დაფანტული ვარ ლეშხივით, ჟვავად,
ქუჩებს აღელვებ, როგორც ქაშანი,
მეჟიჟმატები, თუ გინდა მნამავ...

ვინა ხარ, ტრფობით ასე რომ მრეშავ?
რად დამიშინე ვნების სკარხალი?
მინდა, რომ გახდე ჩემი შხაპუნა,
თქორი იყო ან ცვარი დამფრთხალი.

თუკი მოიშლი ქირსლას გრძნობების,
სულში დაცხრება ჩუღუმის თქეშიც
და სიყვარულის თბილი მანანა
დაგვედინება ნიჟიან ტევრში.