ჯერ ვიყავი ოქროს თევზი, დამიჭირეს და მჭამეს,
მერე ვიქეცი ჯინად, მაშინვე ბოთლში ჩამსვეს.
არც ჰერაკლედ ვყოფილვარ ერთ თვეზე მეტი,
ციკლოპმა რომ დამიჭირა თავში მირტყა კეტი.

აი, ახლა გამახსენდა, ერთ დროს კომბლებსაც ვთლიდი,
შემიჭამეს მთელი ცხვარი, მერე ჩიჩილაკებს ვყიდდი.
ჩემი ცხოვრების მანძილზე მზეთუნახავიც მიყვარდა,
მაგრამ ვნახე შვიდ ჯუჯას კუბოთი როგორ მიყავდა.

ცოტა ხნის წინ კონკიაც კი მოვიყვანე ცოლად,
გაგიკვირდებათ და პირველ ღამეს უცებ იქცა გოგრად.
ამის მერე აღმოჩნდა, რომ მე ვიყავი კატა ტომი,
ჯერი ერქვა იმ წრუწუნას, რომ მომიგო მწარედ ომი.

ამიტომაც ცხოვრებისგან აღარაფერს ველი,
ბედი ისე დამსისინებს, როგორც ვირთხას გველი...