მიშველეთ ხალხნო! - პასუხი არ არის. დუმილი, სევდა, ცრემლი, სიკვდილი. აუტანელი ხდება უკვე ეს ყველაფერი. არ ვიცი რა ვქნა, ვის შევჩივლო, ვისთვის ვიტირო. ყრუდ მესმის ხოლმე ვინმეს ტირილი, ვიღაცის კვნესა, ხანაც სიცილი, ისტერიული, სიმწრის სიცილი. ჩემთვის ვინ არის?- ვაი რომ არავინ. თავისი საზრუნავი აქვს ყველას. მე ვის ვახსოვარ?- არადა... მე ხომ სულ სხვა ვარ...
მიშველეთ ვინმემ!- ისევ ნაცნობი ცივი დუმილი. ბადრი მთვარესავით გაფითრებულ ჩემს სახეს ვერავინ ხედავს, არადა მე ვარ!.. ნუთუ.. ვეღარ მცნობთ?.. თუ... სულაც არ მიცნობთ?.. ჰმ.. თქვენ მე არ მიცნობთ! რაღაც მონაჭორს მოჰკარით ყური და ... ნუთუ ყოვლისმცოდნენი გონიათ თქვენი თავი?.. სასაცილოა.. სირცხვილია, თქვენ მე არ მიცნობთ, თქვენ თავს არ იცნობთ უბადრუკებო! ცხოვრება ვნების, სურვილის დაკმაყოფილება გგონიათ მხოლოდ?- ეს ხომ მე მტკივა, ესეც ხომ მე ვარ. მთლად ნუ წამბილწავ გაუმაძღარო, მთლად ნუ გამწირავ... დედა ვარ შენი...დედა მშობელი...
მიშველეთ შვილნო! მე შეუძლოდ ვარ! ნუთუ ამისი ღირსი ვარ თქვენგან?! ნუთუ მე შევცდი? მაგრამ.. სად? როდის? რაში?...
უმადურებო! - ვაჟა გაჩუქეთ, გამართული მეტყველება დახვედრეთ, ენა დაუწუნეთ, ჭადი მტვერში გაუსვარეთ..
ილია გაჩუქეთ- სიყვარულის ნაცვლად ტყვია აჩუქეთ ჭავჭავაძეს. ტაბიძე გიბოძეთ-ფრთები არ მიეცით მგოსან გალაკტიონს, ფანჯარა არ დაუხურეთ იმ ცივ ღამეში...
გოდერძიც გყავდათ, მსუნაგებო!- შიმშილით მოკალით ჩოხელი გენია...
რომელი ერთი ვთქვა?? ვინ შეირგეთ? ვინ დააფასეთ უმადურებო ?! - აკაკი ? ლადო ? მირზა ? ტერენტი ? ტატო ? რუსთველი ? - ფეხქვეშ გათელეთ!...
თქვენ ჩემო სახე ხართ გაუმაძღარნო! თქვენ მარტო არაფერნი ხართ!
ვეღარ ვიმეტებ უკვე ვერავის... ვინ მოგაშველოთ ? ან რატომ ? მომიკლავთ იმ შვილსაც და მერე მომიხდით ბოდიშს, ჩამოიხოკავთ ლოყებს, მოჰყვებით ბრალდებებს და თითების შვერას „მისი ბრალი იყოო“... თქვენი ბრალია! ყველას ბრალია !... დაიარებით კეკლუცი სახეებით და იმას მპირდებით და მეფიცებით, ხატებთან მეფიცებით რომ ჩემი გადარჩენა გინდათ.. თქვენ!... თქვენ?.. თქვენი თავისთვის ვერ გიშველიათ.. დაფიქრდით, გაიხსენეთ ვინ ვარ, ვინ ხართ და ვინ ვართ ყველანი ერთად, თუ ეს „ერთად“ კიდევ რამეს ნიშნავს თქვენთვის... დაფიქრდი შვილო , ვინ გინდა ვიყო? შენთვის ვინა ვარ? თუ სკიდევ ვინმე ვარ...
მთლად ნუ წამბილწავთ, მთლად ნუ გამწირავ, მთლად ნუ გამაქრობ...
მიშველეთ ჩემნო!- პასუხი არ არის...