სათნო სახის, ახოვანი, მკლავმაგარი,
სამშობლოზე დიდად შეყვარებული,
აშენებდა ღვთის კურთხევით სალოცავებს,
ის ამისთვის იყო დაბადებული.

ღვთის მორჩილი, მჭერმეტყველი იყო ბერი,
ქრისტეს მადლით რწმენას აძლიერებდა,
ის იღწვოდა აჰყოლოდა მთელი ერი,
წმინდა საქმე მათ ცოდვილ სულს არგებდა.

ქადაგებდა ზნეობას და ღვთის სამსახურს,
უფლის ნებით ბევრ საწადელს აღწევდა,
დაეძებდა სიკეთის და მართლის მსახურს.
მათთან ერთად მტკიცე ტაძრებს აგებდა.

ის ებრძოდა სიბილწეს და ბოროტებას,
მისი სიტყვა იყო ხმალზე ძლიერი,
მან შეძლო და სიკეთისკენ მოაბრუნა,
ბევრი ურჩი, ორგული თუ ცბიერი.

უდაბნოში აშენებდა ეკლესიებს,
მოწაფენიც სათანადოდ აღზარდა,
საქართველოს გადარჩენისათვის,
ქრისტეს რწმენა ქვეყანაში გაზარდა.

აღესრულა ღირსი მამა ღრმად მოხუცი,
ანდერძი კი სრულყო ჭირისუფალმა,
ის დაკრძალეს ხანძთის მამათ მონასტერში,
მისი სული მიიბარა უფალმა.