ახდენს ენერგიის თავმოყრას
მზე და გათენებას აჩქარებს,
ნაკლი ბავშვობიდან გამომყვა
ნათქვამს სულ ცოტათი ვაჭარბებ.

თითქოს დროის ათვლა განულდა
თითქოს გრძნობის ყველა ეტაპი
ისვე გავიაროთ ან უნდა
გავლით მაინც ვნახოთ ეს კადრი.
*** *** ***
უკვე ვგრძნობ რომ ისე გავიზარდეთ
განვლილ ცხოვრების წლებს ვერც ჩამოვთვლი,
ვხედავ როგორ მოჰქრის ლიანდაგზე
ტკბილ მოგონებების ეშელონი.

ახლა ყველაფერი ...ნაირია
სიზმრის ყურებაში ბილეთს ვიღებთ,
სახლებს ჩუქურთმიან_აივნიან
ქუჩებს, მისამართებს ვერ ვივიწყებთ.

მინდა მზერით მივწვდე მდინარემდე
სივრცე ნაჭუჭივით გამოვტეხო,
ფირის ნაწყვეტივით ტრიალებდეს
მთებში ჩარჩენილი ხმების ექო.

და შენ უცნობ თარიღს გილოცავდე
ისეთს_უთქმელად რომ მიმიხვდები...
                                                                  2010