- ისევ დაიბადა!
- თავისით მოკვდება.
- რა სწრაფად იზრდება?!
- არა უშავს, ჩვენ მაინც ვერ მოგვწვდება.
- რომ აზროვნებს?!
- მიდი, გონება დაუბინდე.
- რომ ოცნებობს?!
- ბოლომდე მოუკალი.
- შეხედე უყვარს კიდეც!
- გამოიწი, არ გადაგედოს.
- როგორ საშინლად გალამაზდა?!
- დააბერე სანამ დროა.
- დავაბერე, მაგრამ არ მახინჯდება.
- იმიტო, რომ დააგვიანე, უკვე გამრავლდა.
- რატომ ვერ ვკლავ?!
- ძლიერი სული ქონია და გებრძვის.
- სულს ვერ წავართმევ?
- ვერა, შეიძლება დაუმახინჯო, ისიც თუ მოგყიდა.
- მალე მოკვდება?
- უკვე მოკვდა.
- აბა, ისევ იქ რატომაა?!
- ჯერ კიდევ ახსოვთ და იმიტომ.
- მალე დაავიწყდებათ?
- გააჩნია, როგორ იცხოვრა.
- მამა, ვერაფერს ვუხერხებ, აქეთ ვერ მომყავს.
- გაანებე შვილო თავი, ხომ ხედავ კერკეტია, ვერ გატეხავ.

თქვენ მოისმინეთ რადიოსპექტაკლის „მამები და შვილები” მეორე ნაწილი.
გაგრძელება - შემდეგ გადაცემაში, პარასკევს 13 რიცხვში, ზუსტად 13 საათზე.

დარჩით ჩვენთან და არ მოიწყენთ.

ჯოჯოხეთის რადიო აგრძელებს თავის მაუწყებლობას.
ახლა კი თქვენი თხოვნით ვიმეორებთ მსუბუქი მუსიკის კონცერტს.

Dj-ის ხმა მიჩუმდა და რადიომიმღებიდან Heavy Metali-ს ნაზი ჰანგები გადმოიღვარა...