დღეს სუსტი სქესის სისუსტეებზე გადავწყვიტე სტატია შემოგთავაზოთ. პრინციპში სუსტი პირობითად, როგორც წინაპრებისაგან გვსმენია, თორე დღევანდელი კაცების ნაწილი მე უფრო მეტად ”მესუსტსქესება”.
რა სისუსტეები აქვთ ქალებს? შოპინგი, მოგზაურობა, სუნამო, ბრენდული ტანსაცმელი, ძვირფასეულობა, ელემენტარული ყურადღება და რაღა თქმა უნდა უმთავრესი – კაცები! რაღაც გამომრჩა აშკარად…რაღაც სეზონური და ”რაღაჩნაირი”… ხო, ხო, მართალია გარუჯვა! მუქი ფერის კანი რატომღაც ქალებს მეტ თავდაჯერებას მატებს და დიდ უპირატესობასაც სძენს ამ ბოდიში მომითხოვია და თეთრ ქალებთან შედარებით.

გარუჯვის ფორმებსა და მეთოდებს დიდი მნიშვნელობა არ აქვს, მთავარია ფერი და შემდეგ ამ პროცესის ზეპირსიტყვიერად გაფორმება იყოს ”რაღაჩნაირი”. რას აღარ იგონებენ ჩვენი ნაქები მანდილოსნები სასურველი ფერის მისაღწევად. სოლარიუმებში სიარული უკვე არახალი და ყველაზე ”ჯაან რაღაჩნაირია”, ასევე გავრცელებული მეთოდია ”ქალი კარლსონობა” და თქვენ ვერც კი წარმოიდგენთ ”რა საყვარლობაა ზემოდან რო უყურებ მთელ ქალააქს”.

თუმცა ბოლო დროს გავრცელებული ინფორმაციით ქალების კრეატიულობამ პიკს მიაღწია ქალაქში უსაშველოდ აწეულ ტემპერატურასთან ერთად. ახლად დამკვიდრებული მოდის მიხედვით გარუჯვის მსურველები სხეულზე სტაფილოს წვენს, ლუდს და ლეღვის ზეთს ისმევენ და ასე ეფიცხებიან მზეს. ასევე დამკვიდრებული პრაქტიკა ყოფილა სადილის ზეთის წასმა, რაც ვფიქრობ გამართლებული უნდა იყოს. იმდენ ხანს წვანან მზეზე ახალგაზრდები შეიძლება მიიწვან კიდეც. სადილის ზეთი კი კარგი დამცავი საშუალება უნდა იყოს ამ კუთხით (კარგი იქნება მაინც თითო მეგობარი თუ ეყოლებათ გვერდში ყოველი შემთხვევისთვის რომ ამოურიონ ხოლმე).

ყველაზე მეტად კი ერთმა მეთოდმა გამაოცა. მავანს და მავანს სხეულზე მანქანის ზეთი წაუსვია გარუჯვის წინ, რამაც საბოლოოდ დამარწმუნა რომ ქალების გარკვეული ნაწილის გარკვეული უჯრედები მართლაც დასაზეთი უნდა იყოს.

P.S. წავალ ეხლა სასწრაფოდ ლუდს ვიყიდი, სანამ კიდევ ვინმეს შეუზელია ტანზე.