გარეთ თბათვის სურვილებს ვისმენ,
ვერხვის მკლავებში ღამე გაგიჟდა,
მე არ ვეჩვევი ტკივილებს, ვითმენ,
სულიდან კიდევ ვიღაც გავიდა.
ცხოვრება კვალში მიყენებს მდევარს,
მე ჩემში შეშლილ ძალას ვპოულობ,
სამყარო ჩემს წინ მორჩილად დგება
და ჩემი სულის ფურცლებს თხოულობს.
ძველი წარწერა, შეცვლილი ახლით...
ცხოვრება ბედზე გადაწერილა,
ბილიკი, მე რომ ვერაფრით  გავცდი,
ნუთუ ყველაფერს მართლა შეცვლიდა.
ბედს ვეთამაშე, წაგებას არ ვცნობ,
არავინ მითხრას, რომ მე დავმარცხდი,
ცხოვრების ტოტებს ნამტვრევზე ვატყობ-
-უბრალოდ ფრეზე მორჩა თამაში.
და ეხლა ვდგევარ გაძარცვულ ტყეში,
შემოიხია სამოსი ვერხვმა,
ტკივილის წაშლად მოვარდა თქეში,
მკვდარი წარსული მიგდია ფეხთან.
და მე ვბრუნდები, ქარი აღელდა,
სულში ყინული მინდა გავალღო,
ჩემი ცხოვრების მატიანედან
ძველი წარწერა უნდა გავაქრო.