ღმერთო მაპატიე განცდა
უღმერთოების და ბოდვა
უკვე განზრახული, მაგრამ
ჯერ არ ჩადენილი ცოდვა.
ღმერთო მაპატიე, რადგან
წუხელ მთელი ღამე თოვდა...
თოვდა.
ვერ იტყოდი თეთრად,
რაღაც მოიისფროდ უფრო
მერე, ეს სამყარო შეცდა
მერე, ამ სამყაროს უცხო,
გამვლელივით გავცდი,
თავი ავარიდე ალბათ,
რადგან ყველაფერი, მაინც
უკვე აღარაფერს გავდა.
ღმერთო მაპატიე, ბოდვა
რაღაც უსურვილო განცდა
რადგან მთელი ღამე თოვდა
რადგან ყველაფერი კარგად
იყოს, რა თქმა უნდა, წამით
წამის მეასედით თუნდაც,
ოღონდ შემახვედრე ისევ,
ერთხელ დამანახე, თუმცა...
ვიცი, ყველაფერი ვიცი,
გარდა დანარჩენის - ჰოდა
უნდა გადავლახო შიში
უნდა გავამართლო ბოდვა,
რადგან სხვანაირად მტკივა,
რადგან სხვანაირად თოვდა.
უკვე განზრახული, მაგრამ
ჯერ არ ჩადენილი ცოდვა.
ღმერთო მომიტევე, რადგან...
          მენატრება.