იაპონურს კილოზედ


        ჰაიკუ

  1.
  შემოდგომობით
რაღაც  დამჩემდა ჩვევა-
  ვაცილებ ჩიტებს.


  2.
ფანჯრის ჩარჩოში
  ზაფხულის ცის ნაფლეთი
  მოსჩანს უმწეოდ.


  3.
  ზამთრის ღამეში
  თავის შიშს უყეფს ძაღლი,
  რომ მოიშოროს.


  4.
  გესმით, რა საწყლად
  გვიკაკუნებს მინაზე?
  გაუღეთ, წვიმას!


  5.
  ვბერდები, ვატყობ-
  აღარ გავცქერი შურით
  გაფრენილ ჩიტებს.




        ტანკა


        ***
  ჰკიდია მთვარე-
  შუაღამის ცის ჭაღი,
მთლად მილეული.
  გზააბნეულთა მეგობარი,
  გაუქმებული.


      * * *
  არ დაიღალა
ნეტა ლოდინით ეს ცა?  რაც ატლანტები
  გადასახლდნენ ძველ მითებიდან
  ლექსიკონებში.


        * * *
  რომ არ ცოცხლობდეს
  მხოლოდ სამ დღეს პეპელა,
  არ ექნებოდა
  მის სილამაზეს ალბათ
  ხიბლი იდუმალების.


        * * * 
  ძუძუს კერტები
  ჩემი გოგოს ნაზ მკერდზე
  იკვირტებიან
  შინდის კვირტებად ბაგის
  ოდნავ მიკარებაზე.


                * * *
  გავცქერი ზეცას
  ძალზე შეწუხებული-
  ჩამოთოვს ალბათ.
  რა აღტაცებას მგვრიდა
  ერთდროს პირველი თოვლი!


      * * *
  თოკზე ჩამომხრჩვალ
  სარეცხის ჩუმი სევდა
ნაღველს მგვრის მუდამ.
  სიცარიელის უდის
  სუნი, ცივი და მწკლარტე.


    2011