სიბერე
------
მხრები მტვრიანი - საარქივე,
უდაბნოსფერი ქვიშის რუკა,
სიბერე ძველი საათივით,
იცრიცება და რჩება უკან... 

ქუჩა ნორჩებით გაივსება,
აქ ჯადოსნური გზა და წრეა
და გსურს საათი და ისრები,
ბავშვობისაკენ გადასწიო...

მერცხალი ისევ ბუდეს აგებს
და ჩიტი ისე განაბულა
ცდილობს დრო - ჭრელი ბუმერანგი,
საწყის წერლილში დააბრუნოს...

მხრები მტვრიანი - საარქივე,
უდაბნოსფერი ქვიშის რუკა,
სიბერე ძველი საათივით,
იცრიცება და რჩება უკან... 


ქარი
-----
ქარი ბოშასავით ცერზე შემოდგება,
ქუჩა ესმერალდას კაბას იშველიებს,
გვირგვინს დაადგამენ მალე შემოდგომას,
მერე იყვირებენ - მეფე შიშველია...

წყალი გამოექცა ღრუბელს ტუჩებიდან,
ვერსად გავექეცი ოთახს სარკმელიანს,
სულმთლად გალუმპულან ჩემი ქუჩები და
ახლა აღმა - დაღმა წვიმას დაჰყვებიან...


მე გამომწვარი თიხა ვარ,
დღე ქურასავით ინთება,
და მთებს ზღაპრისკენ მივყავარ,
ლეგენდებით და მითებით,

ღრუბლებს ჯიხვის რქით დალევენ
მთის ჭიუხები გულცივად,
ეს ბილიკებიც ნალივით
ცხენებს თუ ამოუცვივდათ...

ფერდობზე გამოფენილან
მეცხვარეები ღიღინით,
აქ ყველა ციხე ცხენივით
თქარათქურობს და ჭიხვინებს.

მე გამომწვარი თიხა ვარ,
დღე ქურასავით ინთება,
და მთებს ზღაპრისკენ მივყავარ,
ლეგენდებით და მითებით,