უღრან ტყეში ცხოველებმა
მორთეს დიდი ნაძვის ხე,
საგანგებოდ მოემზადნენ
და ზეიმიც დაიწყეს.

კარ-მიდამო დაამშვენეს
წვიმებით და ბურთებით,
ლამაზად რომ გაატარონ
ჯადოსნური წუთები.

აუნთიათ ნათურები,
გაუბერავთ ბუშტები,
საჩუქრებით გაუვსიათ
ნაირფერი ყუთები.

ზღარბი დადის დიდი ტომრით
და არიგებს კანფეტებს,
ციყუნია ფუღუროში
გოზინაყსაც აკეთებს.

მხიარულობს რუხი დათვი,
გორავს და კოტრიალებს,
მელაკუდა ცერებზე დგას,
ცეკვავს,წრეზე ტრიალებს.

ტურა თურმე ლექსებს ამბობს,
შაირობენ მაჩვები,
თხუნელები ხითხითებენ,
ტაშს უკრავენ თახვები.

არ ჩერდება მთელი ღამე
დოლი და სალამური,
საახალწლო სიმღერები
ტკბილი და საამური.

ყველა ცეკვავს ნაძვის ხესთან,
არ იძინებს არც ერთი,
აი,თურმე უღრან ტყეში
ზეიმია ასეთი