შორსა ხარ ახლა, სულ შენზე ვფიქრობ,
ვაჩუმებ კითხვებს - იქ როგორ, იქ რომ...
გზავნილად დედის გიგზავნი ლოცვას,
დიდი ხარ უკვე, თორმეტის ოცდა...
ვისთვის რას შეძლებ - ცხოვრება გსწავლობს,
ჯერ გასალეწი გაქვს  ბევრი კალო.
ჭიპლარი შენთან გავწყვიტე მაშინ,
მამა რომ გახდი და შენი ბავშვი
სხვა წელთაღრიცხვად რომ მექცა უცებ...
ჩემს შვილიშვილში შენს თვალებს ვუცქერ
და უკვე ვხვდები ის კარი რომ ვარ,
რომლითაც სულ სხვა ცხოვრება მოვა,
თავისი წილი ხალისით, დარდით
და მე ის დროა, რომ განზე გავდგე...
ბანალურია გითხრა - მიყვარხარ!
შენს გზას ჩემგან რომ სხვაგან მიჰყავხარ
გონებით ვიცი სწორია მაგრამ,
გულს კი ჰგონია გზა და გზა გკარგავს...
შორსა ხარ ახლა, შენს თავს უმტკიცებ,
რომ მაგარი ხარ ყველა უვიცზე
და შეგიძლია ეს ყოფა ზიდო,
მე კი ვლოცულობ - ღმერთო შენ... იქ რომ...
              14.08.13