გთხოვე შემოდგომა მომიტანე, ხეები ოქროსფრად დამიპენტე,
გთხოვე გაზაფხული მომიტანე, გთხოვე არასოდეს დამიბერდე,
გთხოვე მაკოცე და დამაფარე ძილის წინ თვალებზე სიყვარული,
გთხოვე მოიშალე ქარის დევნა და ქუჩაში მარტო სიარული.
გთხოვე, რა არ გთხოვე, წამიყრუე, წახვედი ზამთარი დამიტოვე,
მდგმურად შემისახლე მოწყენა და შენსავით უკარება სიმარტოვე.
გთხოვე, ვკვდები და მინახულე, იმ ქვეყნად შენი ხსოვნა გამაყოლე,
გთხოვე, ბოლოჯერ მაკოცე, რომ იმ კოცნის სითბოთი ვამაყობდე...
გთხოვე, წამიყრუე, სხვამ ისმინა, გულიდან უხმოდ ნათხოვარი,
მოვიდა ამისრულა ყველა ნატვრა, აღარ ვარ სიყვარულის მათხოვარი...
ახლა შემოდგომის დარია და ხეები ოქროსფრად ანათებენ,
სულში გაზაფხულის ქარი მაქვს და ღამეებს ალერსში გავათენებ...