ჟოან ბეტი, მე თქვენ გიძღვნით ამ სიბერეს.
ჯაზია. ფრაკი მამაჩემის ნაქონია
მოვაჭრეთა ქუჩასავით გავიბერე.
Nat King cole .. ქარვისფერი აგონია

და თრიაქი , დაღონება შესაფერი.
დედის წერილს ნუღარ ელი, ჯინი არის.
გადახუხე, "პარიზელო შინაბერა" !
თორემ ვკვდები, მე ასეთი ჯინიანი

შევაკვდები მწვანე მინდვრებს ან ღამეთა
მხცოვანება დამადუმებს. თურმე კედი,
ისე მოკვდა აღარავის ადარდებდა,
ნიავს მისცა ბოლო ღერი სიგარეტი.

მაგრამ თმები რახანია ქარში არის,
რახანია ღმერთი მთებში წავიდა.
შემოდგომის დიდ სევდათა ნაშიერი
აქ ვარ.
აქ ვარ.
აქ ვარ დასაბამიდან

შენი სუნთქვის, შენი მზერის. და ჰენესი
ახლა მინდა , თუკი მსურდა ოდესმე .
მე არ ვიცი სიკვდილი და დანებება,
მინდა მთებით, ქარით, წვიმით მოგდევდე .

ხელებია, შორეული ქრისტეს მიწა,
თუ ყველასგან მოხურული კარი.
Nat king cole .. ფინალი. მე შენ დაგიცავ,
მოვდიოდი, შენ იყავი დედამიწა,
მოვდიოდი, წინ გხედავდი ჩემს საფიცარს
მოვდიოდი და ვერ მოვასწარი .