მამზელ მ.
თითები.
ლიტანია.
ვიცოცხლებ. მოვკვდები. ან რაც გინთად
მომწერეთ.
ეს ლექსი მიმტანია
ენის (ცხელ ლულამდე) თანაც ღირს და

თან დარად საჩემო ფირფიტების
(უთქვენო დღეების მომატებით)
ვირღვევი. ბარათი - ჰიბრიდია
დალევის შემდგომი მონატრების

ღამესთან.
თეთრ დროსთან. ვიხლართები
ფოთლებში - პეპლებად ამერიკულ.
და თქვენს თავს ტრანზიტით
სისხლძარღვების
ვაწოდებ გულმკერდის ავენიუს.

მამზელ მ.
ჯიბეში კაპიკები
მიყრია. გულით კი ასიათას
ოცნებას ვატარებ.
ავიხდენდი.
ახლა რომ იყოთ აქ... იასამანს

თქვენს თითებს დავკრეფდი.
ვეფიცხები
მთვარის შუქს. სანამ მზე იწყება და
ასეთ დროს საერთოდ გეფიცებით
სიკვდილი პირდაპირ
მისწრებაა.
--------------------------------------------
მამზელ მ.
თითები.
ლიტანია.
ვიცოცხლებ. მოვკვდები ან რაც გინდათ!