მინდა თავი ოცნებებით დავიმშვიდო
იქ ვხედავდე კაცს სათნოს და მშვიდობიანს,
როგორია უდარდელად გაიღიმო?!
ქვეყანაში მასიური ფსიქოზია.

სიბნელეში იკარგება სამოთხე
თეთრ ყვავილებს დაესივნენ ჭიები,
ჩემო მიწავ, ტონა სისხლით დაგათვრეს,
მეშინია, რომ ვერ გამოფხიზლდები.

დავაღწიეთ თავი თითქოს დათვის კლანჭებს
მაგრამ ყურში მაინც გვესმის ღრიალი,
უღრან ტყეში ბავშვებივით დავიკარგეთ
ერთმანეთი მერე ვეღარ ვიცანით.

მე მკვლელობა გამიგია მტრისა და
სიყვარული მისწავლია მოყვასის,
საქართველოს ვიცნობდი და მიყვარდა
თქვენ კი ჩემში საქართველო მოკალით