ღრუბელმა ცრემლის ჭიქურებით გაავსო ეზო,
დაბანილ ფოთლებს იბერტყავენ მრავალძარღვები.
შენს სიახლოვეს ძველებური სიმძაფრით ვერ ვგრძნობ,
და ვერც შენს სურნელს, რომელითაც ისევ დავთვრები.

უშენოდ ძილსაც შემაჩვია ჩვენმა ლოგინმა,
ღამით ნაბოდვარს ვერ მიყვება ახლა ბალიში,
ვერც შედეგები გამოიღო გრძელმა ლოდინმა
სინანულისა, რომ ოდესღაც ჩემგან გაგიშვი.

ოცნების გვალვამ იმედებსაც გაუხმო ფესვი,
თვალებში სხივსაც ჩაეძინა საღათას ძილით,
გუშინ წარსულის სადღეგრძელო ბოლომდე შევსვი,
და ბოლო ნერვის ძლივს შევძელი დაჭერა კბილით.

ვერ გამოგიტირე,
ჯერ...


26.10.2014