2313 წლის ერთ მზიან დღეს ინტერვიუერი სახლში ეწვია მეტად საინტერესო ადამიანს. გარეთ კი გვიანი გაზაფხული კეკლუცობდა...
_ მიამბეთ დროში მოგზაურობის შესახებ. როგორ და რა ხერხით არის შესაძლებელი დროში მოგზაურობა? პირადად მე დიდი სიამოვნებით დავბრუნდებოდი წარსულში...
_ რა საჭიროა ამის გაკეთება, რას მოგცემთ თქვენ დროში გადაადგილება?
_ განა საინტერესო არ არის, რა იყო 500 ან 1000 წლის წინათ?
_ დროში გადაადგილება უპირველეს ყოვლისა სულიერი განვითარების უმაღლეს დონესთან არის კავშირში, ოღონდ იმ შემთხვევაში თუ წარსულში დაბრუნება გწადია, მოვლენების ეპიცენტრში ვერანაირად ვერ მოხვდებით. წარსულში გამგზავრებული ადამიანი განსხვავებული წრიული ბრუნვის პროცესში ინაცვლებს, რომელსაც სხვადასხვა ამბებში ჩარევის პოტენცია უქრება.
_ ოოო, სამწუხაროა. არადა რა საინტერესო იქნებოდა წარსულში დაბრუნება და უშუალოდ ამა თუ იმ სიტუაციაში მონაწილეობის მიღება...
_ კაცობრიობის ისტორია სისხლით არის მორწყული. მაინტერესებს წარსულის მოვლენებში მონაწილეობის შესაძლებლობა რომ გქონდეთ, რას გააკეთებთ?
_ არ ვიცი.
_ რატომ? თქვენ ხომ ტექნოლოგიურად განვითარებული საუკუნიდან გამგზავრებული ადამიანი იქნებით, რომელსაც ეცოდინება რა მოხდა, რატომ მოხდა და როგორი ქარბორბალა დატრიალდა კაცობრიობის თავზე. ეს დიდი უპირატესობაა კარგი საქმის კეთებისთვის.
_ არ ვიცი, არ ვიცი, არ მიფიქრია ამის შესახებ.
_ კარგი, გასაგებია, რომ მოინდომო კიდევაც რამის შეცვლა, მაინც არაფერი არ გამოგივა. ასეთია ბუნების კანონზომიერება.
_ მაინტერესებს სულიერი გზის გარდა თუ არის შესაძლებელი წარსულში დაბრუნება?
_ წარსულში დაბრუნება ფიზიკური ხერხითაც არის შესაძლებელი. ამისათვის საჭიროა სინათლის სიჩქარეზე სწრაფად მოძრაობა, თუმცა ამ დროს მატერია უსასრულოდ გაიზრდება... მაგრამ მე მყავს მეგობარი. მისი სახელია ტობი*. სწორედ მან იცის თუ რა გზებით შეიძლება მასის ზრდის შეჩერება, ოღონდ რეცეპტის სააშკარაოზე გამოტანას ჯერ არ აპირებს.
_ მეცნიერები უკვდავების საშუალებას ეძებენ და როგორც აცხადებენ სწორ გზას ადგანან. თქვენ რას ფიქრობთ ამის შესახებ?
_  ამ სამყაროში, მატერიალური ფორმით ჩარჩენას არანაირი აზრი არა აქვს. მხოლოდ ერთი დედააზრი არსებობს: ადამიანები უნდა გაეცალონ ამ განზომილებას, ვინაიდან ასეთია ბუნების პროგრამა.
_ როგორც ცნობილია თქვენ სულიერი განვითარების უმაღლეს დონეს აღწევთ და წარსულში ბრუნდებით ხოლმე. კაცობრიობის ისტორია კი სისხლით არის მორწყული. მაინტერესებს წარსულის მოვლენებში მონაწილეობის შესაძლებლობა რომ გქონდეთ, რას გააკეთებთ?
_ რომ შემეძლოს ყველაფერს გავაკეთებდი იმისათვის, რომ მოვლენები უკეთესობისკენ შემომეტრიალებინა, მაგრამ როგორც ავღნიშნე წარსულში გამგზავრებული ადამიანი განსხვავებული წრიული ბრუნვის პროცესში ინაცვლებს, რომელსაც სხვადასხვა ამბებში ჩარევის პოტენცია უქრება. სხვა მოცულობა უკვე  სულიერი განზომილებაა. ამიტომ, ჩვენ არ მოგვეცემა ამა თუ იმ დროში უშუალოდ მონაწილეობის მიღების საშუალება. წინააღმდეგ შემთხვევაში ჩვენ სამყაროს შექმნის ერთიან პროგრამას შევეწინააღმდეგებოდით. ეს თითქმის შემოქმედთან გათანაბრების ტოლფასი იქნებოდა. აი ჩემს მეგობარ ტობის კი რეაქტიული მფრინავი ხომალდით არაერთხელ უმოგზაურია დროში. ტობი უბრალოდ წარსულში დაფრინავს და ამ ფრენას მხოლოდ ერთი მიზეზი აქვს. ეს მიზეზი კი თქვენს მიერ ნახსენები უკვდავებაა.
_ უკვდავება?
_ დიახ! იმ სიჩქარით მოძრაობის პირობებში, რომელიც სინათლის სიჩქარეს აღემატება _ ხდება დროის უკან სვლა, ხოლო ტობი, აგერ უკვე სამასი წელიწადია თავის ოჯახთან ერთად ყოველ ოც წელიწადში ერთხელ ირმის ნახტომის გალაქტიკაში წარმოუდგენელი სისწრაფით დაფრინავს და ახალგაზრდობას, უფრო მეტიც, სიცოცხლეს ინარჩუნებს.
_ ოოო, ეს მართლაც დაუჯერებელი ამბავია...
_ თქვენი ნებაა, გინდ დაიჯერეთ, გინდ არა.
_ გამაცნობთ ბატონ ტობის, საინტერესო იქნება მასთან ინტერვიუს ჩაწერა.
_ გაგაცნობთ, მაგრამ ინტერვიუზე უკვე ძალიან დიდი ხანია უარს ამბობს. როგორც თვითონ მითხრა, მასთან ბოლო ინტერვიუ სამასი წლის წინ მალთაყვის სანაპიროზე ჩაუწერიათ.
_ სამწუხაროა.
_ რა გაეწყობა.
_ კარგით, დავუბრუნდეთ ჩვენს თემას და გთხოვთ მიპასუხოთ, თქვენს მიზანს რა წარმოადგენს, როცა სულიერი შესაძლებლობების ხარჯზე უბრუნდებით ხოლმე წარსულს?
_ ჩემს მიზანს მოვლენების გვერდიდან ყურება და სმენა წარმოადგენს.
_ რას უყურებთ და რას უსმენთ წარსულში?
_ მაცხოვარს, უფალს ჩვენსას იესო ქრისტეს!
_ ქრისტეს?
_ დიახ ქრისტეს!!! მე იმ პერიოდს ვუბრუნდები, როდესაც უფალი მოციქულებს მოძღვრავდა. მეც მათთან ვარ და ვუსმენ უფალს. მე მეცამეტე მოციქული ვარ!
როდესაც ინტერვიუერი მასპინძელს დაემშვიდობა და სახლი დატოვა, უმალ ქალის ხმა გაისმა!
_ ტობ ნახე ტელევიზიით რას უჩვენებენ...
ეს ქალი ტობის მეუღლე იყო, ხოლო ხანშიშესულ, დროში გარდატეხილ ტობის უკვე კარგა ხანია განზრახული ჰქონდა, რომ ირმის ნახტომის გალაქტიკაში რეაქტიული მფრინავი ხომალდით სინათლის სიჩქარეზე სწრაფად აღარ ეფრინა.

2014 წელი

სქოლიო:

*ტობი _ 1) იხილეთ მოთხრობა _ „დროში გარდატეხილი ტობი“. 2) ეს უძველესი სახელია, რომელიც გვხვდება ძველი აღთქმის წიგნში _ ნეფთალემის ტომის წარმომადგენელი ტობი.