მე მთლიანი ქალი ვარ.
მე მთლიანად მტკივა თვეში ერთხელ მოსული სტუმარი.
მე მთლიანად ვიღებ ამ სტუმარს მუცლის ბოლოდან თავის ბოლომდე.
ერთი ფეხი რელსზე მიდგას, მეორე- სადღც.
მე მთლიანი ქალი ვარ და მთლიანი სიყვარული შემიძლია.
სიყვარული შენ ხარ.
მე მთლიანი ქალი ვარ.
შენ ძალა დაკარგული სიყვარული.
შენ ჩემი ტკივილის პროპაგანდა.
შენ ჩემი სტუმრის მტერი ხარ.
შენ ჩემი სტუმრის მამა ხარ.
ჩემი სტუმარი ცხრა თვით მესტუმრა.
შენ სტუმრის მტერი ხარ.
შენ გაიქეცი.
შენ მოკალი.
მე დავრჩი.
მე მთლიანი ქალი ვარ.
მთელი, მაგრამ არა სრულყოფილი.

ცხრა თვის შემდეგ, ისევ სტუმრობა ყოველთვიურად.
ისევ ტკივილი მუცლის ბოლოდან თავის ბოლომდე.
ის არ მესტუმრა.

მე ნახევარი ქალი ვარ.
მე ნახევრად მტკივა თვეში ერთხელ მოსული სტუმარი.
მე ნახევრად ვიღებ ამ სტუმარს მუცლის ბოლოდან გულამდე.
მე ნახევრად მახსოვს ყველაფერი.
მე ნახევრად მახსოვხარ- მესტუმრე, მესროლე და წახვედი.
მე ნახევრად მიყვარხარ და ნახევრად მძულხარ.
მე ნახევრად მოგკალი.
მე ნახევარი ქალი ვარ და მთელი სული მაქვს.
მე ნახევარი ქალი შენს ნაჩუქარ ნახევარ სტუმარს ვმარხავ.
მე ნახევარი დედა ვარ.
დავმარხე.
მე ნახევარი დედაც აღარ ვარ.
მე მეოთხედი ქალი ვარ.
მე მეოთხედი სიძულვილი დავმარხე.
მე მეოთხედი გრძნობით გაგიხსენე.
მე მეოთხედი გრძნობით მძულხარ.
მე მეოთხედი ქალი ვარ
და მე შენ ვეღარასდროს მესტუმრები.
მე მეოთხედი გული მაქვს,
მეოთხედი სიყვარულითა
და მეოთხედი სიძულვილით.
მე მეოთხედი ნაყოფი დავმარხე.
მე არც მიყვარდა და არც მძულდა.
მე მეოთხედი ქალი ვარ
მეოთხედი გრძნობებით
მეოთხედ სივრცეში
მეოთხედად ქცეული.
მე მეოთხედი დედაც აღარ ვარ.
მე ერთი ფეხი რელსზე მიდგას, მეორე- სადღაც.
მე მეოთხედი ქალიც აღარ ვარ.