აცვია შეცივნულ სახლების საკვამურს
ბუხრების პერანგი,- ცას თვალი ეწვება,
წაბლივით მოხარშულ წერილებს გიგზავნი
და ფელამუშივით ღრუბელი სქელდება.
წვიმები იდგამენ კიბეებს ფანჯრებთან,
გზა თვალებს აპარებს ჟანგიან ჭიშკრისკენ,
ერთმანეთს აცლიან სიმინდებს ქათმები,
ქვაბს ვადგამ ბუხარზე და ვდგები პირ-იქეთ.
უშენოდ ეს ღამეც ჩამწვარი შეშაა,
თოკებზე გაფენილს გიტოვებ მოლოდინს,
გუშინაც მესიზმრე და ჭასთან გავედი
და მერე წყლით სავსე სათლებით მომქონდი...