ნუ მოხვალ ჩემს საფლავზე. .
მე იქ არ ვწევარ,
გატყუებენ,
ადრევე მოვკვდი
და იმ ქუჩებზე გავიფანტე შენ რომ დადიხარ. .

მაპატიე რომ ზოგჯერ გატირებ,
როცა ქარია და მტვრიანი ქუჩები
თვალებს გიღლიან. .

ნუ მოხვალ მეთქი ჩემს საფლავზე,
იქ შემოდგომის ყვითელი ფოთლებია დამარხული,
ცრემლებით ვზარდე ხე,
რომ შენ ჩრდილში დაგესვენა. .
ფოთლები დამარხულია გესმის?
ტოტები დაატეხეს მეზობლის ბავშვებმა. .

მაპატიე,
რომ სიყვარულმა ფესვი გაიდგა,
რომ წასასვლელი ჩახერგა გზები,
გავიტოტე
და ისე მჭიდროდ მიგიკარი ვეღარ სუნთქავდი. .

მაპატიე,
რომ ფეხებში გედებოდა ჩემი სიყვარული. .
მიწას მომაშორეს. .
ფესვები დამაწყვიტეს,
ვტიროდი. .

თავისუფალია მეთქი შენი გზები.
სიმშვიდით გევლოს..

ახლა მოდიან და გატყუებენ,
რომ აქ არის ჩემი საფლავი. .
ნუ მოხვალ.
ადრევე მოვკვდი. .

მაპატიე რომ ზოგჯერ გატირებ. .