ნინო დარბაისელი

წყალობით შენით
- - -
      (სოფო წულაიას)

იმის წყალობით,
ამის წყალობით,
წყალობით შენით
იმდენჯერ ვიშვი,
ვერანაირი ვეღარ მერევა  ელდა და შიში,
არც  შეცოდება არ მჭირდება,
ფუჭი ვიშვიში.

და თუ დღეს ისევ ცოცხალი ვარ,
ნაპობი ძელი,
არ შემეკითხო,
აქამდე ცოცხლად როგორ გავძელი.

იმის წყალობით,
ამის წყალობით,
წყალობით შენით,
ისევ და ისევ,
იმდენჯერ მოვკვდი,
სიკვდილი ისე გავითავისე,
რომ ამ სიკვდილით
მე პირთამდე თავი გავივსე.

და თუ ერთხელაც, მართლა მოვკვდი,
შენ კი არა და
მეც ვერ გავიგებ,
კვლავ მიწაზე ვარ,
თუ წამიყვანა არსთა გამრიგემ.