***
მეზობლის სახლიდან ცხელი პურის სუნი გამოდის,
ჩვენ ექვსი ბავშვი ერთ მანდარინს
ვიყოფთ და ვწვებით...

***
უხარია კაპიტანს,
როცა მის გემზე შეისვენებს
ფრენით დაღლილი მერცხალთა გუნდი...

***
ჰკითხე ჯერ ნაჯახს,
იქნებ არ უნდა ამ ხის მოჭრა
ადამიანო?!!!

***
ზოგი მწერი ადამიანზე ბედნიერია,
მათ ყვავილებზე შეუძლიათ
თამაში, ძილი...

***
წყალმა წაიღო წისქვილი,
და რახანია არაფერზე
არ მიფიქრია...

***
ქარმა ფოთლები კარებთან მომიტანა,
შემდეგ წასაღებად დაბრუნდა და
არ გავატანე...