ქალები ისხდნენ წყაროზე,
მოჰგავდნენ კუპრის ყვავ-ყორნებს.
ვერავინ ვერ გადაურჩათ,
ჭორებით ისე დაჰკორტნეს ...
---
ცხოვრებამ, როგორც საფქვავმა,
ბევრი ამბავი გადაფქვა.
---
ადამიანი, ქვეყნად მოსული,
სევდიანია და მარტოსული.
---
წვიმა კანტი-კუნტი,
სველი კატის კნუტი.
---
- რა გნებავთ?
- ლიმონიანი
ჩაი.
- ცხელია, ფრთხილად!
ინებეთ,
აი ...
---
იქ, სადაც შვილი მამას სჯობს,
იქ სიცოცხლეს გაუმარჯოს!
---
როდესაც ერში სიცოცხლე ზეობს,
ერი ასულობს და ერი ძეობს!
---
როგორ ხდება, რომ სიკეთე ბოროტების იღებს სახეს,
სიკეთის ქმნა თან ამონებს, თან ობობას ქსელში ახვევს?
---
დროს უკვდავება მაშინ წაართვი,
როცა დაცალე ქვიშის საათი.
---
ნუ მოინდომებ
სხვის ქადასა და ნაღებს,
პირს ნუ დააღებ!
---
თქვა თეთრმა ორქიდეამ:
- ნახეთ ეს ჩემი ფრთები,
მომხიბლა, ჰო, იდეამ!
თეთრ მტრედად გავფრინდები.
---
იმ ქალებმა, რომლებსაც სიყვარული პურზე მეტად შიოდათ,
ფუფალასავით გამოიგონეს მათი ოცნების შიოლა.
---
ეს ცხოვრება თამაშია,
საიდუმლო ამაშია!
---
წინწკლავს და წვიმს,
თან მომწონს, თან მწყინს ...
---
უფალმა შეგვქმნა
და სამყაროზე მისი ხელია.
მხოლოდ მან იცის,
ვინ ბრძენია და ვინ კი ხელია.
---
ყვავილების თაიგული პაწაწინა -
წარსულია უკვე, ცხოვრებაა წინა ...
---
ნაკუწებად დახეული თან მიჰქონდა ქროლვას ქარის -
ვინ? სად? როდის? - ჩანაწერი მომაკვდავი ქონდაქარის.
---
° ქონდაქარი - ჯალათი
---


მზია თვალაბეიშვილი
დაწერილია სხვადასხვა წლებში.