ხეებს მორღვევიათ ფერადი ფარჩები,
ქარი ფოთოლცვენის სევდიან ბლუზს უკრავს.
მზე კი ამ ფერების სიუხვეს ნაჩვევი,
ნელთბილ სახეს მალავს ღრუბლების ზურგს უკან...
ქარი ამ სეზონის ცნობილი "ბლუზმენი"
უკრავს გულისწყვეტას, ნაცნობს და სევდიანს...
ხეები ხელების ჩაქნევით უსმენენ,
ფოთლები ტოტებს კი უჩუმრად სწყდებიან.
და მერე მოჰგვანან  დაფანტულ მონეტებს,
და იცვლის გარემოც იერს და სამოსელს.
დროს ფოთოლცვენაზე დაწერილ სონეტში,
არ უნდა ნაღველზე სიტყვაც რომ წამოსცდეს...