ბათუმი. პორტი. ნავსადგური. ევროპის სუნი. აღმოსავლეთიც. ბათუმი მშვიდი. ბათუმი ჩუმი. პროვინციის მდორე დინება. არცა ხოტბა. არცა გინება. ამღვრეული და ჭრელი რასსა. დაბნეული ქართული სული. მოედანი. ხალხმრავლობა. ბაზარი. ქუჩა. აღმოსავლეთი სულ შუკა-შუკა. თეთრი წვერი. ყაბალახი. ყავახანები.  მეჩეთი. ხოჯა. ფეხმორთხმული თათარხანები. სულ უცხო ლოცვა. მუჰამედის ნატერფალები.... ბულვარი. ზღვა და არიელი ამორძალები. ბათუმი ჭრელი. ბათუმი ჩუმი. დაბნეული ქართული სული. ბარი. ბენსონი. დახვეწილი რბილი ბარმენი. ინტიმის შუქი. მეწამული ვნების ბაგენი. ყავა ქუჩებში. ყავა ფანჯრებში. სურნელება ყავის ამდენი სად არის კიდევ? და მერე ისევ აღმოსავლეთი. კრიალოსანი. წვეროსანი აღმოსავლურ სახე-ქანდაკით. ავტობუსები სოფლებისკენ. ქუჩა - ბარდაგი. ინტურისტი. უცხო ჯიშის შხვართი ტურისტი. პლაჟი. ზღვა და სულ შიშველი ქალი ურიცხვი. ეკლესია. მღვდელი. ლოცვა. სტილი გოთური. ინტერიერი ქართულიც და კათოლიკურიც და კიდევ რაღაც, მომიტევეთ, რაღაც მეჩეთის. ტაძარი ხვალის. საუკუნის ოცდამეერთის. ნავსაყუდელი. თევზის სუნი. სუნი მეთევზის. ძველი ბათუმი. პარიზული ტკბილი ფერები. დახვეწილი ნატიფი ხაზი. არცა შტრიხი არსად  ზედმეტი. ხორცის ზეიმიც. აჭარული ხაჭაპურები. აღმოსავლური ტკბილეული. მსუყე სუნები. კაბის ფეტიში. ჩაძირული ხორცში სულები. პარკი. ბულვარი. ყომარბაზნი. და მოხუცები: სულ სხვა გულები. ძირეული ბათუმელები. ფლეგმები ოდნავ, მაგრამ წრფელები. ბათუმი. პორტი.  ნავსადგური. ევროპის სუნი. აღმოსავლეთიც. ბათუმი მშვიდი. ბათუმი ჩუმი....