მიყვარხარ დედამიწიდან,
კოსმოსის გავლით ღმერთამდე,
მიყვარხარ კარგად იცი და
ნეტავი ჩემს თავს შეგრთავდეს

ბედი, ვამბობდი ყოველთვის,
უგონებოდ თუ გონებით,
მე როგორც ქალი პოეტი,
ისე ვერ მოგეწონები,

როგორც რიგი და წესია,
მოგესურვება როგორაც,
მე ერთი ცალი ცოლი და
შენგან ფეხმძიმე გოგონა...

ვზივარ და ვუსმენ ბეთჰოვენს,
გემოვნებით თუ გემოთი,
ცოლად რომ ცხრაჯერ გეთხოვე,
ცხრაჯერვე გამოგყვებოდი.

თუმც ყველაფერი ვერ ჩავდე,
გრძნობის მორევში ვიცი და
კოსმოსის გავლით ღმერთამდე,
მიყვარხარ დედამიწიდან.