უფულო კაცის დარიგება
                                                                  მომავალ თაობებს

გრძნობის ქარ-ცეცხლსში გახვეულს, ჩირად არ გაგდებს მავანი,
კაცად რომ გიცნონ ბიძიკო, ფულის შოვნაა მთავარი.

გაფხეკილ ჯიბის პატრონი არც ცოლს სჭირდები, არც შვილს,
გინდ ლომის გული გქონდეს და გინდ ფრთებით ჰგავდე არწივს.

ვირის თავ-ფეხი იყავი, გინდ სულით იყავ ბოზი,
ჯიბის საამო ჩხრიალში, ზღვასაც კი შესვამ კოვზით.

პოლიტიკოსებს ეძმე და ბიზნესმენთ უწყვე სუფრა,
თუ გინდა ამ მყრალ სოფელზე გადიშლიგინო სუფთად.

აქე და უქე საქმენი, ააფერადე ლიქნით,
შენც ზომე წუთისოფელი მათი ზომით და ნიხრით,

საჯდომზე ჰკოცნე "ზეკაცებს", პატარებს ჩასცხე მუჭი,
გადაიყარე გულიდან მამულზე ფიქრი ფუჭი,

ჰყიდე სამშობლოს მთა-ბარი, და რასაც მისწვდე ჰყიდე,
სხვამ თესოს, შენ კი ეცადე ბარაქიანად მკიდე.

ქონებას თავს რომ მოუყრი, თუ დადგამ სადმე საყდარს,
ხელი გამოჰკრა იქნება ინდულგენციას ნაღდსაც,

ჰოდა ეს მძაგე ცხოვრებაც ჩაივლის ბოლო-ბოლო,
დროს ტარება და ქეიფი! - აი რა გვრჩება მხოლოდ...

გრძნობის ქარ-ცეცხლსში გახვეულს, ჩირად არ გაგდებს მავანი,
კაცად რომ გიცნონ ბიძიკო, ფულის შოვნაა მთავარი.