ჩაიღვარა დაღლილი მზე სილურჯეში,
ზღვამ მძივებად დაიყარა ქარვა,
ჩაიხვია ათრთოლებულ თბილ უბეში,
სულ არ იცის ზღვამ გრძნობების მალვა...

ქარი წვეთებს ეთამაშა, სდია...
მოხრილ ჩრდილებს დაეკონა ტალღა,
სველ ქვიშაზე ვარსკვლავები ყრია,
ცამ ნაპირთან  დაიცალა კალთა.

იდუმალი სიყვარულის მოლოდინში,
ტრფობის ალი მოსდებიათ ძეწნებს,
მარაოსებრ შემაგება პალმამ ტოტი,
ჩემს დაკარგულ სანაპიროს ვეძებ...